全球兒童青少年粵文徵文
Global Cantonese Writing Initiative for Youth
15–18歲 / 15-18 year-old
亞軍 / Runner-Up
我嘅兒時夢想係做一位作家
作者 / Author︰Emily Lee Tsoi Yi
地區 / Region︰香港 / Hong Kong
學校 / School︰@thechineseuniversityofhongkong
阿媽：「你記唔記得你細個想做一個作家呀？」
好朋友：「哈？點解我唔知你想做作家嘅？」
我：「因為有啲不設實際，哈哈。」
我細個好鍾意作故仔，亦都好鍾意整啲遊戲同其他小朋友一齊玩，阿嫲更話我係個整古做怪嘅小朋友。我亦都好鍾意睇褔爾摩斯、老夫子，睇睇下就想自己試下天馬行空咁寫故仔，所以我試過寫一本書仔。
筆記簿嘅頭幾頁寫滿咗大大粒、向左傾斜嘅中文字，文字中有啲用水筆綑咗邊、用木顏色油嘅插畫。掀後幾頁，就會感受到三分鐘嘅熱度。宜家本書仲喺櫃桶入面，就好似我呢個作家夢，一齊放咗入去儲物櫃，成為兒時嘅一個回憶。
因為理性，所以放棄呢個作家夢。
我嘅讀書成績一般，中文作文更係我嘅死亡之卷。有一次班主任喺家長日度提起我作文有詞不達意呢個問題，之後每次一知道班主任係教中文，阿媽就會玩玩下咁問老師：「請問佢宜家作文仲有冇詞不達意呢個問題呀？」慢慢咁，望住一張張嘅成績表，我發現無論我手上支鉛筆刨得有幾尖、我腦入面嘅想法有幾大膽都好，我所識嘅詞彙都係無辦法承載我嘅故事，進步空間太大啦。小學唔興派範文，到中學嘅時候先見到同學嘅佳作，原來啲同學個個文筆都好好，自己仲一直停留喺小學生嘅程度。
喺嗰個時候，我先發現自己不自量力。
好多人當作家係一個副職，呢幾年更係見到附近嘅書局一間間執笠。細個每次去大眾書局最鍾意就係戴住耳機聽歌、去睇新文具新玩具，嗰陣時每次喺書海入面搵返阿媽嘅時候，總係見到好多人喺度打書釘，原本廣闊嘅書廊淨返一條小路比人行。
中小學都好興用閱讀卡嚟鼓勵學生睇多啲書，甚至用嚟做升精英班嘅其中一個準則。記得每次臨近截止日期嘅時候，啲同學好興三五成群去抄書名，我問佢哋先知道原來佢哋平時無睇書嘅習慣。
現今世代，小朋友一扭計，好多時家長奶嘴都唔使用，直接出動電話。但係我始終相信，書仲係有佢存在嘅價值，之前第一次去首爾旅行，見到佢哋地鐵站竟然有書店，我相信香港都可以，但係就要睇下我哋點樣培育下一代。
💬 評審黎奕葆博士評語
💬 Comments from Judge Dr. Yik Po Lai
作品以幾段回憶，寫出自己作家夢嘅開端同挫折，並由個人經歷延伸到對香港閱讀文化轉變嘅觀察。作品寫實、真誠、唔造作，情感抒發拿捏得宜，唔會太過沉重。作者對生活細節觀察敏銳，書店打書釘嘅人、同學為閱讀卡而抄書名等描寫，頗有畫面感。作品最後仍然相信香港可以培育出鍾意睇書嘅下一代，為文章留下希望同反思。